1 Wafalme 19:4-8; Zaburi 34; Waefeso 4:30-5:2; Yohana 6:41-51
Lishe ya Mwili na Roho
Wapendwa, leo ni Jumapili ya 19 ya Kipindi cha Mwaka wa Kanisa. Yesu anaendelea na mazungumzo yake na umati kuhusu mkate wa uzima. Yesu hatulishi kwa neno la uzima tu, bali leo anatoa pia mwili wake kama mkate wa uzima. Kama vile miili yetu inavyohitaji chakula ili kuishi, kukua, na kutekeleza shughuli muhimu, ndivyo pia roho zetu zinavyohitaji chakula ili kuishi na kuwa komavu kwa ajili ya uzima wa milele. Ikiwa tunafanya mengi kulisha miili yetu ambayo siku moja itaoza, tunapaswa kufanya zaidi kulisha roho zetu ili ziwe na nguvu za kutosha kuingia katika Ufalme wa Mungu. Je, unailisha roho yako mara ngapi?
Tunapokosa chakula kwa ajili ya miili yetu, tunadhoofika na kushindwa kuendelea na shughuli zetu za kila siku. Vivyo hivyo, tunaposhindwa kulisha roho zetu, tunadhoofika na kushindwa kuishi kulingana na mapenzi ya Mungu. Nabii Eliya katika somo la kwanza la leo alikuwa amefikia hatua ya kukata tamaa. Alitamani kufa kwa sababu kila mtu alikuwa kinyume naye. Hata hivyo, Mungu alimtuma malaika wake kumpelekea mkate uliompa nguvu mpya ya kutembea tena kwa siku arobaini hadi kufika mlimani alipokuwa amemwagiza aende. Wengi leo wamekwama maishani bila maendeleo yoyote kwa sababu roho zao ni dhaifu sana. Wengine kwa sababu ya kiburi na wengine kwa sababu ya kutokujua. Mwandishi wa Zaburi anatupatia dawa ya kiburi na kutokujua: “Onjeni mwone kwamba Bwana ni mwema.”
Katika sakramenti, Yesu alitupa chakula kwa kila hali na kipindi cha maisha yetu ili tuweze kuendelea kusonga mbele. Sakramenti ni ishara wazi zinazoonekana, za neema ya Mungu isiyoonekana na zilizofanyishwa na Kristo mwenyewe ili zilete neema au kuzidisha neema katika maisha yetu.
Katika Sakramenti ya Ubatizo, tunazaliwa katika familia ya Mungu kwa ondoleo la dhambi zetu, hasa dhambi ya ubinadamu uliopotoka inayoitwa dhambi ya asili. Katika Ekaristi, tunapokea mwili na damu ya Kristo kama chakula cha roho zetu katika safari ya kwenda mbinguni. Katika Kipaimara, tunapokea mapaji ya Roho Mtakatifu yanayotutia nguvu kuwa waumini thabiti na wahubiri wa neno la Mungu kwa ajili ya wokovu wa ulimwengu. Katika Kitubio, tunaponywa na kupatanishwa na Mungu na jirani. Katika Mpako Mtakatifu, tunapokea nguvu za kuvumilia mateso katika magonjwa na tumaini katika ulinzi wa Mungu. Katika Daraja Takatifu, tunachaguliwa kutoka miongoni mwa watu wa Mungu kuwa wawakilishi wa Kristo kuhani duniani, na kuendelea na utume wake wa kuwatakasa watu. Hatimaye, katika Ndoa Takatifu, tunashirikiana na Mungu katika kuzaa na kulea watoto kwa ajili ya dunia na kwa ajili ya ufalme wa Mungu.
Kristo ndiye Sakramenti ya Mungu Baba. Yeye ni ishara inayoonekana ya Mungu asiyeonekana. “Hakuna mtu aliyemwona Baba, ila yeye aliyekuja kutoka kwake.” Alikuja kutufahamisha njia za ufalme wa Mungu ili tuweze, ikiwa tutachagua, kuurithi. Mtakatifu Paulo anatuita kuwa waigaji wa Mungu ambaye kamwe hana kinyongo, hafugi hasira, wala kuinua sauti yake kwa yeyote. Kinyongo kinaacha mioyo yetu ikiwa imekunjana na haijalishi tunakula kiasi gani, hatuwezi kuwa na afya njema. Hasira ni ishara ya udhaifu wa roho, na kuinua sauti hata kwa waliopo chini yako ni ishara ya kutojiamini. Jifunze kumheshimu kila mtu, ikiwemo wasaidizi wako, nao watakudhamini na kukuheshimu pia. Wabatizwa ni Sakramenti za Kristo; kumfanya Kristo ajulikane duniani. Je, namwakilisha Kristo kwa wengine kwa njia gani?
Afya ya mwili ni muhimu ili kufanya kazi ipasavyo. Ili kupata afya ya mwili, tunapaswa kupata lishe bora na yenye virutubisho. Hii imekuwa changamoto kwa wengi. Jambo la kushangaza ni kwamba matajiri wana matumbo makubwa kwa sababu ya kula vyakula visivyo vya mwendo kasi, wakati maskini nao wana matumbo makubwa kwa sababu ya utapiamlo (kukosa lishe). Roho yenye afya inasaidia mwili kuwa na afya na umakini katika utendaji. Ili kupata roho yenye afya pia lazima mtu ale chakula bora cha roho. Jambo lingine la kushangaza ni kwamba wakati matajiri hawana nafasi ya kulisha roho zao, maskini wanakimbilia kula chakula cha roho cha mwendo kasi. Hawa pia hawana nafasi ya katekesi ya roho. Wengi hawajui ladha ya mlo halisi kwa sababu wamekuwa wakila chakula cha mwendo kasi tangu walipozaliwa. Ni nani atakayewakomboa matajiri na maskini?
Wpendwa, roho yenye afya ni kichocheo cha maisha yenye afya. Tusishughulike zaidi kulisha vizuri miili yetu na tukasahau kulisha roho zetu. Vyote viwili vinahitaji kutunzwa. Ili kufanikisha hili, nidhamu kubwa inahitajika.
Jumapili yenye baraka.
Fr. Lawrence Muthee, SVD
SVD JAMBO KENTAN 