Siku ya Kuwaombea Marehemu Wote

Siku ya Kuwaombea Marehemu wote

Hekima 3:1-9; Zaburi 22 (23); Warumi 5:5-11; Marko 15:33-39,16:1-6

  “Tunakufa ili tuishi”

Wapendwa, leo ndiyo siku tunayokumbuka na kuombea roho zilizotangulia mbele za haki. Rangi za liturujia leo ni Zambarau na nyeusi. Zambarau ni ishara ya toba, na nyeusi ni ishara ya maombolezo. Kifo ni ishara kubwa ya kukinzana kwa sababu inaonekana kwa upande mmoja kuangamiza uhai na kwa upande mwingine kuwa wakati wa kutoa uhai mpya. Yesu, akizungumzia umuhimu wa kifo chake, aliwaambia wanafunzi wake. “Amin Amin nawambia, chembe ya ngano isipoanguka katika nchi, ikafa, hukaa hali hiyo peke yake; bali ikifa, hutoa mazao mengi” (Yn 12:24). Njia pekee ya Kwenda mbinguni ni kupitia mlango wa kifo.

Kifo pia ni tukio la hakika zaidi katika maisha ya binadamu na kila mtu analifahamu hilo. Tunaweza kujaribu kulisahau, hata kwa makusudi tunaweza kutojali, na tunaweza kuasi kwa ghasia dhidi yake, lakini hatimaye halikwepeki. Hata wakati madaktari wanatuambia kwamba hakuna tiba kwa mgonjwa anayekaribia kufa, tunaona kuwa ni wajibu wetu kutumia kila tulicho nacho kujaribu kuongeza maisha yao. Hatimaye, mgonjwa anakufa na tunatumia hata gharama zaidi katika mazishi yao. Tunapohudhuria mazishi, mara nyingi tunazingatia zaidi kumwomboleza marehemu kuliko kutafakari kifo chetu wenyewe ambacho hakiepukiki. Mazishi pia yanaweza kuwa fursa nzuri ya kuomboleza kifo chetu wenyewe kwa sababu tunapokufa, hatutaweza kufanya hivyo.

Baada ya kusema ukweli huu unaonekana kutisha kuhusu kifo, niruhusu nilete kipengele cha imani kinachoangaza nuru ya tumaini katika maisha ya binadamu. Kutoka kitabu cha Mwanzo, tunasoma kwamba Mungu aliwaumba wanadamu kwa sura na mfano wake, na kwa hiyo sisi ni wa milele kama Mungu alivyo. Hata hivyo, kwa kutenda dhambi ya kutotii na kutaka kuwa kitu zaidi ya kile Mungu aliwafanya kuwa, mwanaume na mwanamke walileta juu yao wenyewe kifo cha mwili duniani.

Kwa mtazamo wa kisayansi, kifo hutokea wakati moyo na ubongo unasimama. Kiroho, kifo ni utengano wa mwili na roho na mwili kurudi kwenye mavumbi na roho kurudi kwa Mungu. Tunaamini kwamba Mungu aliwaumba wanadamu kuwa wa milele, lakini sio kuishi milele katika uso wa dunia bali kurudi kwake na kuishi milele. Hii inatufanya tufikirie aina mbili za kifo zinazowezekana kwa binadamu tofauti na wanyama wa porini ambao wanakufa mara moja tu. Yesu pia alisema ukweli huu alipowaambia wanafunzi wake: “Lakini nitawaambia wa kumwogopa, mwogopeni yule ambaye baada ya kuuwa mwili ana mamlaka ya kutupa roho katika jehanamu” (Lk 12:5). Jehanamu ni kifo cha pili na kibaya zaidi.

Janga kubwa Zaidi katika maisha ni kupoteza kitu ambacho mtu amekuwa akikitamani sana, kuona Mungu jinsi alivyo na kuishi milele. Kifo kinachukuliwa kuwa kikatili kwa sababu kinachukua mambo mengi tunayopenda kama sauti ya mpendwa, mambo mazuri tuliyoshiriki nao, nyuso nzuri, watu wenye maarifa, kiongozi mzuri, na orodha inaweza kuendelea. Walakini, kifo pia ni mwisho wa taabu na mateso ya ulimwengu huu na mwanzo wa maisha ya milele ambapo machozi yote hufutwa (Ufu 21:4).

Yesu alikuja kutuokoa sio kutoka kwa kifo cha mwili na uharibifu wa miili yetu ya kufa lakini kutoka na kifo cha milele (jehanamu) kilichosababishwa na dhambi. Yeye mwenyewe alikufa na kufufuka ili kutupatia matumaini ya kufufuliwa kwetu wenyewe. Cha ajabu pekee ni kwamba ingawa wokovu umetolewa bure kwa wote, sio kila mtu anaukubali au kuuchagua.

“Kwa maoni yangu, jambo lenye huzuni zaidi duniani sio kifo bali uhuru wa kuchagua. Kutoka kitabu cha Hekima, leo tunasoma kwamba roho za wenye haki ziko mikononi mwa Mungu. Baada ya kifo cha mwili, roho za wenye haki zitarudi kuishi milele pamoja na Mungu na roho za wasio haki zitawekwa chini ya adhabu ya milele. Tumaini letu haliko bure na hatupaswi kamwe kufikiria kwamba yote yanamalizika na kifo cha kimwili kama wasioamini wanavyofikiri.

Leo tunaombea roho za waliotangulia, ambao wanaweza bado kuwa toharani (mahali pa kusafisha kwa wale waliokufa na madeni ya kulipa). Sala zetu zitawasaidia kupunguza kipindi chao cha kusafishwa, Vox Populi, Vox Dei – Sauti ya watu ni sauti ya Mungu. Mradi tupo duniani, tunaweza kubadilika kutoka kuwa wema na kuwa waovu au kutoka kuwa waovu na kuwa wema kama tunavyotaka. Walakini, wakati tunapoaga dunia, tunaaga na chaguo tulilolifanya kabla ya kufa. Wale wanaokataa kabisa uwepo wa Mungu na kuishi kinyume na amri zake watafufuliwa katika hukumu ya milele. Wale ambao hawakukanusha uwepo wa Mungu na wokovu katika Kristo na kufa katika dhambi watafufuliwa toharani ili kusafishwa kabla ya kuingia mbinguni. Maombi yetu hayawezi kubadilisha hali ya wale wa kwanza lakini yanaweza kusaidia wale wa pili. Hii ni imani yetu iliyothibitishwa katika ufunuo (2 Makkabayo 12:44).

Wapendwa, imani na tumaini katika wokovu uliotolewa kwetu kupitia Kristo Yesu vinapaswa kutufanya tuishi kwa haki hata katika ulimwengu ambapo ufisadi unatukuzwa sana. Fikira za kufa kwa wapendwa wetu na kifo chetu wenyewe hazipaswi kudhoofisha moyo bali kututia moyo kuenenda kwa fadhila na haki. Tunapowaombea wapendwa wetu waliofariki kwa imani, naomba pia tuchukue nafasi hii kufikiria kuhusu kifo chetu wenyewe na kurekebisha mambo tunayohitaji kubadilisha katika maisha yetu. Tunakufa ili kuishi na sio kuishi ili kufa.

Kuweni na siku njema yenye baraka.”

Pd. Lawrence Muthee, SVD